پیر صابر شاہ اتے رحمت سلام خٹک دی پارٹی سانگے خدمات کوں خراج تحسین
نویں قیادت دا صوبہ دے سارے ضلعیں اچ عوامی رابطہ مہم شروع کرنڑ دا اعلان
اسلام آباد ۔ 17 اپریل (اے پی پی) وزیراعظم محمد نواز شریف پارٹی رہنماواں نال مشاورت دے بعد انجینئر امیر مقام کوں پاکستان مسلم لیگ (ن) خیبر پختونخوا دا صدر اتے مرتضیٰ جاوید عباسی کوں جنرل سیکرٹری مقرر کرڈتاہے ، صدرِ پاکستان مسلم لیگ (ن) وزیراعظم محمدنواز شریف دی سربراہی اچ خیبر پختونخوا دے سینئر لیگی رہنماواں دا اجلاس سنوار کوں وزیراعظم ہاوس اچ تھیا۔ وزیر اعظم آفس توں جاری بیان دے مطابق وزیراعظم محمد نواز شریف اتے لیگی رہنماواں ایں موقع تے سابق صدر مسلم لیگ (ن) خیبر پختونخوا پیر صابر شاہ اتے سابق جنرل سیکرٹری رحمت سلام خٹک دی پارٹی سانگے خدمات ، نظریاتی وابستگی اتے کاوشاں کوںزبردست خراج تحسین پیش کیتا۔وزیراعظم محمد نوازشریف ایں موقع تے امید ظاہر کیتی جو نویں مقرر کردہ عہدیداران مسلم لیگ (ن) کوں خیبر پختونخوا اچ مزید فعال اتے مضبوط کرنڑ دی غرض نال ساری صلاحیت استعمال کریسن تے عہد یداران مسلم لیگ (ن) دے کارکناں کوں نال گھن تے ٹرسن ۔ وزیراعظم ایں موقع تے آکھیا جو خیبر پختونخوا ہمیشہ توں مسلم لیگ(ن) دا گڑھ رہیا ہے اتے انشااللہ آندے انتخابات اچ وی مسلم لیگ (ن) خیبر پختونخوااچ شاندار کارکردگی دا مظاہرہ کریسی۔ ایں موقع تے نویں صدر امیر مقام اتے جنرل سیکرٹری مرتضیٰ جاوید عباسی وزیراعظم اتے سارے لیگی رہنماواں کوں یقین ڈوایا جو آندے انتخابات اچ خیبر پختونخوا اچ مسلم لیگ (ن) دی حکومت بنڑاونڑ اچ چنگاں کردا ر ادا کریسن تے خیبر پختونخوادے عوام دیاں محرومیاں اتے شکایتاں دا ازالہ کیتا ویسی ۔ انہاں مزید آکھیا جو مسلم لیگ (ن) خیبر پختونخوا دے عوام کوںمایوس کائناں کریسی تے ایں سلسلے اچ وختی سارے ضلعیں اچ عوامی رابطہ مہم دا آغاز کیتا ویسی ۔چھیکڑ اچ مسلم لیگ (ن) خیبر پختونخوا دے سابق جنرل سیکرٹری رحمت سلام خٹک دی والدہ مرحومہ جیرھی جو ہنڑے ہی وفات پا گیاں ہن انہاں دے ثواب سانگے فاتحہ خوانی کیتی گی ۔ اجلاس اچ راجہ محمد ظفر الحق ، اقبال ظفر جھگڑا ، خواجہ سعد رفیق ، انجینئر امیر مقام ، مرتضیٰ جاوید عباسی ، سردار مہتاب احمد خان عباسی ، ڈاکٹر آصف کرمانی ، سرانجام خان ، سینیٹر نزہت صادق ، سینیٹر بیگم نجمہ حمید ، سینیٹر پرویز رشید، محترمہ مریم نواز شریف ، کیپٹن (ر) محمد صفدر ، پیر صابر شاہ ، جعفر اقبال ، بیگم عشرت اشرف ، صدیق الفاروق ، رحمت سلام خٹک ، میاں راشد علی شاہ اتے شیر زمان ٹکر شرکت کیتی۔
.jpg)
