اسلام آباد۔16اگست (اے پی پی) وزیراعظم محمد شہباز شریف ملک اچ قیمتی پتھراں دی صنعت دی ترقی اتے برآمدات اچ ودھارے کیتے شعبے اچ اصلاحات متعارف کراوݨ دا فیصلہ کریندیں ہوئیں آکھیا جو قیمتی پتھراں دی روایتی طریقے نال کان کنی اے قیمتی اثاثہ ضائع تھیندا پئے۔ وفاقی حکومت گلگت بلتستان اچ قیمتی پتھراں دی کان کنی، تراش خراش اتے ویلیو ایڈیشن دی صنعت دا عالمی معیار دا پائلٹ پراجیکٹ شروع کریسی۔ جمعے کوں وزیراعظم میڈیا آفس توں جاری بیان موجب وزیراعظم محمد شہباز شریف دی صدارت قیمتی پتھراں دی صنعت دی ترقی اتے اوندے شعبے دی اصلاحات بارے جائزہ اجلاس جمعے کوں تھیا۔ اجلاس اچ وفاقی وزرا جام کمال خان، خالد مقبول صدیقی، احد خان چیمہ، محمد اورنگزیب، رانا تنویر حسین، ڈاکٹر مصدق ملک، گورنر سٹیٹ بینک جمیل احمد، وزیراعظم دے کوآرڈینیٹر رانا احسان افضل، گلگت بلتستان، آزاد کشمیر اتے خیبر پختونخوا دے چیف سیکرٹریز اتے متعلقہ اعلی حکام شریک تھیے۔ اجلاس کوں ملک اچ قیمتی پتھراں دی استعداد، کان کنی دے اڄوکے طریقے اتے برآمدات بارے ݙسیندیں ہوئیں آکھیا جو گلگت بلتستان، خیبر پختونخوا اتے آزاد کشمیر اچ قیمتی پتھراں دے وسیع ذخائر موجود ہن۔ انہاں علاقیاں اچ کان کنی کیتے روایتی طریقے استعمال کیتے ویندے پئں جئیں پاروں قیمتی پتھر ضائع تھیندے پئن۔ اجلاس کوں ݙسیا ڳئیا جو وݙے مقدار اچ ذخائر دے باوجود پاکستان توں قیمتی پتھراں دی برآمدات دا حجم کجھ ملین ڈالر اے۔ وزیراعظم کوں قیمتی پتھراں دی صنعت اتے ایندے شعبے دی اصلاحات بارے تجویزاں پیش کیتی ڳئی۔ اجلاس کوں گلگت بلتستان اچ قیمتی پتھراں بارے ہک کلسٹر ٻݨاوݨ دی تجویز وی پیش کیتی ڳئی۔ وزیراعظم تجویزاں تے عملدرآمد دی ذمہ واری وفاقی وزیرنجکاری کوں ݙیندیں ہوئیں ہک ہفتے اچ گلگت بلتستان اچ پائلٹ پراجیکٹ دے لائحہ عمل کوں پیش کرݨ دی ہدایت کر ݙتی۔ وزیراعظم کوں ݙسیا ڳئیا جو پاکستان اچ ایں ویلھے قیمتی پتھراں دی کان کنی بارے 178 وݙے لائسنس ݙتے ڳئن جڈانجو قیمتی پتھراں دی 18 اقسام پاتی ویندن۔ پاکستان دی قیمتی پتھراں دی برآمدات دا 80 فیصد حصہ خام مال اے۔ وزیراعظم قیمتی پتھراں دی جدید کان کنی، تراش خراش، پالشنگ اتے ویلیو ایڈیشن بارے پاکستان افرادی قوت دی پیشہ وارانہ تربیت کیتے ہک جامع لائحہ عمل نافذ کرݨ دی ہدایت کیتی۔
.jpg)
