اسلام آباد ۔ 16 دسمبر (اے پی پی) صدر مملکت ڈاکٹر عارف علوی تعلیم دی اہمیت ڈسیندے ہوئیں آکھیے جو غربت مکاونڑ کیتے تعلیم تے صحت دیاں سہولتاں اہم ہن ، دنیا کوں پیش آندے ماحولیات جیہوجے مسلیں نال نبڑنڑ کیتے تعلیم یافتہ انسانیت دی ضرورت اے ، تعلیم یافتہ نینگر ملک تے قوم اتے دنیا دی بہتر انداز اچ خدمت کرسگدن ، نویں ٹیکنالوجی کوں استعمال اچ گھن آتے تعلیم دی تلویں سطح تے فراہمی یقینی بنڑائی ونج سگدی اے ، مقبوضہ کشمیر اچ گزریل پنج مہینے توں سکول بند ہن ،کہیں کوں سکول کھلنڑ دا پتہ کائنی ، بھارت اچ مذہب دے ناں تے نفرتاں کھنڈائیاں ویندیاں پن ۔ سنوار کوں”علم پاسیبل سمٹ 2019 “نال خطاب کریندے ہوئیں صدر مملکت آکھیے جو برٹش کونسل دا اے پروگرام خوش آئنداے، اے میڈا تے موجودہ حکومت دا ہر دل عزیز مشن اے ۔ انہاں آکھیے جو غریب بالاں کوں سکول گھن آونڑ کیتے ہک سماجی تنظیم نال رل تے کم کیتے ۔وزیراعظم عمران خان صحت تے تعلیم کوں معاشرتی خدمت کیتے چنڑیے ۔ انہاں آکھیے جو برٹش کونسل ولوں 3 لکھ85 ہزار آﺅٹ آف سکول بالاں کوں سکول گھن آونڑ اچ بہوں وڈی خدمت اے ۔ انہاں آکھیے جو تعلیم صرف پاکستان اچ کائنی بلکہ پوری دنیا دا مسئلہ اے ، دنیا کوں درپیش ماحولیات جیہوجے مسلیں نال نبڑنڑ کیتے تعلیم یافتہ انسانیت دی ضرورت اے ، تعلیم یافتہ نینگر ملک تے قوم تے پوری دنیا دی بہتر انداز اچ خدمت کرسگدن ۔ صدر مملکت آکھیا جو برطانوی حکومت پاکستان اچ تعلیم دے شعبے اچ اہم کردار ادا کریندی پئی اے ۔ برطانوی شہزادہ ولیم دے دورہ پاکستان دے موقع تے ایں حوالے نال وی گال تھئی ۔ انہاں آکھیے جو بالڑیاں کوں سکول بھیجنڑ دے حوالے نال اساکوں معاشرتی اعتبار نال لوکاں دی سوچ بدالنڑ دی ضرورت اے ،اپنڑے حلقے اچ بالڑیاں دی تعلیم کیتے سکولاں دی اپ گریڈیشن کرائی ۔ گزریل کجھ سالاں اچ صرف سکولاں دے انفراسٹرکچر تے توجہ ڈتی گی لیکن ہنڑ انفراسٹرکچر دے نال نال معیار تعلیم تے وی ٹوجہ ڈتی ویندی پئی اے ۔
